講到《AOE》(世紀帝國)，絕對係即時戰略Game中的名牌！望穿秋水，最新一集《AOE3》終於今個星期到貨；記者殺落平時靜靜局嘅PCGame場，忽然變得人頭湧湧，個個都話要第一時間睇吓隻Game有幾正；望住畫面，個個睇到張口結舌，實時戰鬥系統超逼真！記者網上越洋訪問台灣《AOE》世界級高手──陳志誠，佢話今次《AOE3》Load碟時間短，但3D畫面質素成反比地「超華麗」，兩軍交戰時，一顆炮彈可叫城牆倒塌、軍隊炸飛，直情睇戲一樣，必玩！
記者、攝影：陳國輝
炮火廝殺畫面逼真
戰爭係呢隻遊戲嘅骨幹，今集嘅戰鬥場面，絕對可以用逼真、細膩嚟形容。記得上集就算槍來炮往，畫面上都有啲假假哋嘅感覺；但係，今集以戰爭實況為賣點，例如作戰時，步槍及大炮會吐出極真實嘅硝煙嚟加強戰爭氣氛；而建築物被大炮擊中嗰陣，更有壯觀嘅爆炸場面；甚至有玩家打到水戰，形容大炮擊落水面或船身時，嗰種水花四濺嘅震撼場景，只會喺第三集先見到！不過，硬件要求相當高，就連台灣微軟都推出一台專玩《AOE3》嘅家用電腦，真係「玩」得好認真！
新增「首都」系統
喺玩法上，今集特別強調「首都」（HomeCity）呢項系統。所謂「首都」，就係國家嘅核心，佢主宰國家嘅資源調配、軍事策略，甚至未來嘅發展模式！例如，當戰爭勝利次數愈多，首都嘅威望與規模就愈大，繼而商業發展、殖民地資源都會愈嚟愈豐富；另一種功能，就係當領土不斷擴張嘅時候，「首都」亦擔當軍事補給角色，屬於強大嘅支援後盾！拓展殖民地同時，「首都」更可根據個人喜好而發展，想以經濟抑或軍事為重心，完全掌握喺玩家手中。
加入美洲土著結盟
一味向別國開戰、廝殺、爭奪殖民地都唔係辦法！今集新加入「美洲土著盟友」，目的係以和平嘅外交手段，與唔同嘅文明部族結盟，例如伊洛郭族（Iroquois）、拉科塔族（Lakota）、阿茲台克族（Aztec）、克里族（Cree）以及森密諾爾（Seminoles）等，藉此掌控當地嘅財富以及資源，對向外拓展及鞏固個人勢力，絕對有幫助！另外，玩家會經歷日與夜、酷熱與冰天雪地等各種天氣環境，如果唔結盟，單靠軍事稱霸世界，極可能失敗收場㗎！
Profile
機種：PC
類型：即時戰略
發行：MicrosoftGameStudios
開發：EnsembleStudios
語言：中、英
Microsoft（23889600）
限量珍藏版水路抵港
今次《AOE3》除咗會推出普通版，更公開發售禮盒裝限量珍藏版！後者包括3隻GameDisc、一張27首歌嘅SoundTracks，以及製作花絮DVD等；喺製作花絮，製作人員除介紹全新戰鬥系統，並會披露士兵、大炮等3D動畫製作過程，絕對值得收藏再睇。雖然，限量珍藏版只限台灣區發售，但係筆者行過港九電腦商場，均見到有店舖發售，《AOE》迷唔使擔心啦！
西城電腦（25916920）
灣仔東方188商場134舖
《AOE3》一出！香港Game場迫爆
《AOE3》英文版喺10月25日已經到港，但係玩家最期待嘅中文版本，則於兩日後（27日）先抵達。筆者喺灣仔東方188商場，見到位於一樓兩間售賣PCGame嘅店舖，已經播緊《AOE3》片段，在場重勁多人圍住嚟睇，令到本來擠迫嘅走廊更水洩不通！見到咁熱鬧，就即場訪問咗部份玩家，睇吓佢哋點講！
戰爭場面好靚
今集嘅3D地形，好似平原、城鎮等，都比上一集做得更出色；而爆炸、槍擊等肉搏戰鬥場面，亦真實咗好多！
齋打唔係辦法
今集要多啲與人結盟，並且要善用新增嘅「首都」系統，調派軍隊及補給資源，雙管齊下，贏面就會更大喇！
高手點睇《AOE3》
《AOEII》喺2000年推出至今，曾舉辦過多項國際大型比賽！今次筆者在網上越洋訪問的陳志誠（小志），就曾經勇奪《AOEII》世界大賽台灣代表選拔賽第四名，兼《神話世紀》（AgeofMythology）亞洲杯冠軍；由於小志有咁強嘅打機背景，所以在未出Game之先，就曾以測試員身份試玩《AOE3》！
「今集嘅戰船係前所未有咁華麗！交戰場面更比第二集逼真好多！特別係當軍隊或建築物被炮擊時，四周都會受到牽連，好令人震撼！而且，今集兵種亦比前作亦真實咗好多！喺交戰時Load碟時間亦明顯縮短，相對番升級了咁多的畫面，的確有好明顯的進步！」
至於對初玩《AOE3》的朋友，小志亦分享他的打機心得：「不要把這款遊戲想得太難，只是你還不熟悉而已，等你熟悉了，你就是高手！」
