鄭伊健和梁詠琪（GiGi）的分手傳聞鬧得滿城風雨，伊健表示在傳媒高度關注下發展戀情，雖然有壓力，但同時更加浪漫，更加有火花，他說：「我哋兩個就好似一套電影咁，只有男女主角先會明白箇中嘅感受。」
分享愛：「男女主角才明白」
鄭伊健和梁詠琪屢傳分手，隨着兩人先後否認，加上GiGi在北京酒店遇上雌雄大盜，第一時間致電伊健後，二人的分手傳聞才暫告一段落。不過早前伊健辭演無綫的《翡翠歌星賀台慶》時，GiGi竟是透過林珊珊才得知男友辭演原因，難免令人覺得這對情侶溝通不足。
笑女友沒進步
鄭伊健日前回應說：「啲人見你哋拍咗咁多年拖，應該唔係結婚就分手啦，但我覺得最緊要係享受過程，我哋嘅感情一直好穩定，不過我哋一齊時好少講工作嘅嘢，亦唔會夾吓點同記者講，甚至工作嘅檔期亦好少去問對方，除非計劃去旅行，先會夾吓個期。
「其實今次（分手風波）事件，佢有問過我應該點答記者，我話『順其自然囉』，佢真係咁樣答記者，但點知又瀨嘢，其實我都唔明，佢入咗行咁多年，對住記者答問題都冇進步，其實我諗佢對住記者好緊張，有壓力想答得好啲，但一緊張就有反效果。有時我都會抱住『睇吓你今次又點答先』嘅心態，好似佢話低調交往咁，我都唔明同樣一句說話，你講我講都冇事，但一到佢講就出事，或者由我同佢一齊開始，就已經答乜都死。」
問分手傳聞會否影響兩人的感情，伊健說：「咁又唔會喎，佢份人都幾似我，件事發生之後好快就冇嘢，可以講係樂天，所以唔會有乜嘢問題。至於話影響感情，有好有唔好啦，我哋喺大家高度注視下發展戀情，兩個人當然會有壓力，但同時又更加浪漫，更加有火花，我哋兩個就好似一套電影咁，只有男女主角先會明白箇中嘅感受。」
無悔許下誓言
問到伊健的愛情觀，他說：「其實我嘅愛情觀好簡單，就好似我父母咁，佢哋由拍拖到結婚就一齊到𠵱家，所以我覺得愛情就係咁，到𠵱家都係咁諗，但如果中間有變，自己都唔想。」記者指當年若不是他承諾會照顧邵美琪一生一世，其後和梁詠琪拍拖就不會惹來群眾如斯大的反應，對此伊健說：「我從來冇後悔講過呢句說話，當時想講咪講囉。」至於可有信心跟GiGi步入教堂，伊健說：「結婚呢樣嘢唔講嘞，呢啲信心都係留番畀事業啦。」
