一直覺得鄭伊健的事業心不太強，尤其比起女友梁詠琪，更顯得有差距，伊健謂事實並非如此，他說：「其實我有野心，而且野心好大，大到我根本就做唔到，所以無謂講，人哋話我冇野心、遊戲人間，咪冇野心囉。有人話我以前好紅，但其實我根本冇覺得自己真正紅過，或者我咁講，啲人會話『你去死啦』。之前喺紅館開演唱會（九八年）開八場，我覺得開得咁少，開完之後我即時覺得自己死嘞會走下坡，我諗我係好有危機感嘅人。」
再戰樂壇
伊健的事業跟愛情有所連繫，自從九九年《中華英雄》後，伊健經「奪麵雙琪」後跟GiGi一起這六年，事業一直沒甚起色，對此他說：「我梗係知自己dup啦，就算我唔知，啲雜誌都成日寫嚟話我知嘞。」
伊健和合作多年的經理人林珊珊一起加盟BMA，伊健除了拍電影和劇集外，亦會再戰樂壇，現時樂壇確實難撈，問伊健打算如何突破，他說：「幾時娛樂圈都難撈㗎啦，以前我唱歌，唔會知自己想唱啲乜嘢歌，但𠵱家我就好知自己想唱乜嘢類型嘅歌。
享受過程
「我同以前嘅心態唔同咗好多，我𠵱家比較着重工作過程多於成績，享受咗過程就得，好似呢幾年拍嘅戲雖然唔係好收得，但係我清楚知道我學咗好多嘢，反而以前人哋話我紅嘅時間，我唔知自己喺度做緊乜。頭先有人叫我陳浩南，我希望嚟緊可以再拍一部戲或者劇，人哋叫我劇中嘅角色，咁就可以叫做成功。」
說多謝：感激父母予自由
鄭伊健有一兄一妹，雖然他不是和父母同住，但每星期必定有一次家庭聚會。問他在愛情、事業和家庭中如何排位，伊健說：「呢個問題我答唔到你，愛情、事業同家庭都排第一，我自己排第二囉，因為缺少咗是但一樣，都會冇意思。」
樂天悲觀兼備
伊健表示要特別多謝父母這些年來對他的寬容，他說：「咁多年嚟，除咗一開始阿爸反對我入娛樂圈之外，之後我做任何嘢，佢哋都係咁支持我，任何緋聞新聞見報，佢哋都唔會打電話追問我，感情同事業，佢哋畀咗我完全嘅自由，所以真係好多謝佢哋。」
一直覺得伊健性格樂天，但原來他同時遺傳了母親的樂天和父親的悲觀，伊健說：「你諗吓，我同一時間感情上搞到咁大件事、事業又走下坡、買樓又負資產，真係癲咗都似，你睇我冇嘢？我有嘢你唔知啫。不過人生係要經歷嘅，我𠵱家算係有經歷嘅人，唔似得初出道時，係一張白紙。」如今伊健經歷了豐富的人生，亦算是活得精采吧！
採訪：張止寒
攝影：仇志德
場地提供：Elcid
