愛民邨商場係全港首個附設商場嘅公屋，絕對係本地超齡屋邨之一，近年啲大銀行成日俾人鬧，話佢哋結束晒屋邨分行，或者轉做全自動化銀行中心，搞到啲長者要山長水遠咁搵銀行。
不過，交通銀行就人棄我取，揀咗愛民商場原本係渣打銀行嘅舊行址，開設第三十九間分行。為咗隆重其事，重特登請咗日前來港出席建設銀行酒會嘅交行副行長錢文揮，主持開幕儀式。
可能愛民邨好耐都冇銀行開分行，噚日開幕禮有醒獅採青表演，吸引咗大批街坊圍觀拍掌，一啲居民重拎出相機拍照，住喺樓上嘅居民亦唔執輸，伸個頭出嚟睇足全程，好似過緊舊曆新年咁。其實，舊屋邨周不時卧虎藏龍，假日停泊嘅Benz，隨時可媲美高檔豪宅，難怪交行自己都話，呢度啲居民財富積聚效應好強。
爆料熱線：29290000、27860099
報料傳真：26239278
報料電郵：[email protected]