聽日就係萬聖節，大家好可能會應吓節去睇今期大熱嘅《怪誕屍新娘》（CorpseBride），適逢呢個星期，同樣由添布頓執導嘅《朱古力獎門人》（CharlieandtheChocolateFactory）推出咗DVD，大家可以趁住萬聖節未到之前，體會一下添布頓充滿童真嘅一面。
記者：梁瑋瑜
添布頓（TimBurton）同「騎呢片」呢三個字，簡直有如等同掛鈎！好似至經典嘅《怪誕城之夜》就係由佢編劇、賺人熱淚講「奇幻」父子兩代情嘅《大魚奇緣》，亦出自呢位騎呢導演手筆，喺佢手上任何電影都可以變得天馬行空，今次將家傳戶曉嘅童話故事拍成電影，繼續起用愛將尊尼狄普做主角，產生咗特別香甜嘅化學作用！
幸運金卡換間廠
生產WonkaBar嘅朱古力廠因為曾經有員工偷取秘方，已經有15年從未開過門，冇人見過有工人出入工廠，但奇怪在工廠仍然不斷咁生產朱古力。有一日，朱古力廠長WillyWonka將五張幸運金卡放喺朱古力裏面，抽到呢張幸運金卡嘅小朋友，就有入內參觀朱古力廠嘅機會，瞬即引起全球哄動。
住喺朱古力廠附近嘅故事主角查理屋企非常貧窮，不過就非常幸運地抽到幸運金卡，唔單止可以完成參觀朱古力廠呢個夢想，最後佢善良單純嘅性格重得到WillyWonka賞識，成為朱古力廠繼承人㖭。
童話故事寓意深
《朱古力獎門人》表面上係一個童話故事，但係睇落其實諷刺意味甚重，故事裏面查理以外嘅小朋友，都有好差嘅性格：岳少天生貪婪，有得食就乜都唔理；波波娃非常好勝，經常要表現出自己比人強；咪仔沉迷新科技，有嚴重暴力傾向；嘉嘉被父母寵壞，有強烈佔有慾；呢四個小朋友喺故事裏面都因為自己嘅性格而得到唔好嘅下場，只有善良、重親情嘅查理有個好結局，雖然「好心有好報」嘅故事喺現實裏面唔係成日發生，但係亦反映到新一代小朋友嘅問題，源頭好多時都係因為父母嘅縱容。
特訓松鼠拍戲
相信大家除咗鍾意尊尼狄普嘅WillyWonka造型之外，重會對由DeepRoy一人分飾無數個隆巴小矮人（Oompa-Loompa）印象深刻，咁就更加要睇吓DVD送嘅BonusFeature，睇完之後先知道DeepRoy原來花咗好多時間練習當中嘅歌舞，為咗令電影拍出嚟更逼真，工作人員重製作咗好多個可以做唔同表情動作嘅隆巴小矮人模型，製作十分大規模！另外電影裏面出現嘅松鼠都經過特別訓練，先至可以拍到咬合桃嘅鏡頭，絕對唔係淨係用CG畫出嚟㗎！記者睇完之後更加覺得呢齣電影誠意可嘉，喺今年裏面都算係高度好評嘅一齣戲！
發行：華納
區碼：3
售價：$188
DVDPro(23326326)
地址：旺角奶路臣街6E德發商場地庫B4舖