新意網（8008）嚟緊星期五會派發06年度首季（9月止）成績表，唔理業績係龍定蟲，股價再跌，誘發長線收集動機。新意網2000年上市之後，經歷過01年911同03年非典肺嘅惡啃期，新意網呢兩年股價最低位分別見過0.8元及1蚊位，慘淡期，都不過如此而矣。
眾所周知，新意網大股東係新地（016），大股東背景極之雄厚，冇有怕。又新意網NAV1.55元，雖則現價（1.25元）折讓兩成水位，唔算點吸引，但集團手頭現金連債券組合講緊高達14.7億銀，亦代表現價近60%係現金及債券值，穩陣過抬油。
再講，新意網街貨市值區區3.8億銀，現金及債券總值，係街貨市值2.8倍！新意網街貨市值喺現水位翻一番，到7億6銀，現金債券值仍然凸章7億銀，買新意網，買佢錢多。唔理業績點，股價調整，見1.2元樓下，開始分段收貨，擺中線博驚喜。
中華網勝在銀彈多
中華網（8006）最近呢個月整咗個小型下降通道，上星期五啱啱去到通道底，又講兩點：第一，中華網呢期拓展網上遊戲，重係處於投資期營運初階，業績重未實淨，但中華網同上邊新意網一樣，勝在銀彈多，到今年6月底手頭現金同高流動性資財務資產10億銀，現金底厚。
第二，中華網03年搞流動電訊業務，有聲有色，雖則，咁唔等同新拓展網上遊戲業好掂，但管理層眼光，有佳績紀錄，說服力加分。呢期短打上望通道頂0.55元，潛在回報率16%，博唔博，自己諗。但呢隻股仔，長線都要昅實，皆因中華網相對積極，金多未必要私有化；但若然新業務掂檔，一樣存在有大孖沙敲門併購條件。
錢雋