西九龍豪宅一號銀海發生火警，報紙話燒咗八個鐘頭，但係發生火警嗰一座冇乜大損害，只係燒咗安全網啫，連鋁窗都冇燒到，真係不幸中之大幸。
俗語話火燒旺地，一九八七年維園對面柏景台臨完工之前，咪又發生大火，之後樓價升到飛起，一號銀海會唔會又係一樣？
與地盤總監惡佬明講起，佢話：「你有所不知矣，我睇電視，消防員在火場噴射鹹水，大大話話有三四個鐘頭，至撲熄場火。啲石屎鋼筋俾鹹海水噴咁耐，點會唔受損？呢個豪宅對住海，海風帶鹹味吹上幢樓，內裏的鋼筋、石屎就好容易耗損，十年八年後，好可能外牆滲水，無法解救，負責任嘅發展商一定會喺受影響嚴重嗰一幢樓，將啲石屎鑿出嚟，重新鋪過。據我嘅師傅講，當年柏景台就係咁樣做，所以拖延咗入伙日期大約六個月。」
遲六個月入伙，會唔會俾買樓人士追索呢？呢樣惡佬明就唔識答，惟有問地產黃。地產黃話：「你同我定，現在市場上，實際用家數目比較少，投資者最多。適值加息時期，樓盤轉手冇咁容易，越遲交樓嘅話，就可以延遲上會時間，投資者唔知幾歡迎。」
地產投資者之中，只有好少數係買樓收租，等長期升值嘅啫，其他都係短線炒家，前日到上海總會食飯，碰到地產Ｌ，佢話市道甚慢，一手樓盤買家，七成係炒家，昨日行過香港會，碰到地產Ｃ，佢直情話：「邊有七成咁少，十成就真。賣樓一睇就知，凡要求最長期交樓，情願畀利息嘅，必係炒家無疑，𠵱家有一樓盤年底交樓，報紙話一啲業主情願平手出讓，蝕手續費，呢啲相信係散戶炒家。大炒家可以同大業主傾，再延長一年先至成交，守住先。」咁樣即係鬥耐性，鬥韌力，炒家現在唔容易轉身，實力弱啲嘅，明年會投降。