皇仁書院出咗唔少人才，當中有一段又一段香港故事，唔淨止「皇仁之龍」一個。資深大狀兼立法會議員湯家驊Ronny本身就係一個「好好嘅香港故事」，佢噚日出席油尖旺區議會扶貧工作小組嘅誓師大典，同一班小朋友講自己成長經歷，鼓勵佢哋要樂觀做人。
驚入唔到官立學校
湯家驊話自己一世都好幸運，自己細個時屋企窮，冇錢入正式註冊嘅幼稚園，只係喺一間由一對新移民夫婦開辦嘅家庭式託兒中心度接受所謂學前教育。但幾年之後，呢兩位「老師」同佢講唔可以再教佢喇，佢話當時感到好彷徨，唔知有冇機會入讀官立學校接受免費教育。好彩當時開咗間東院道官立小學，湯家驊一跳就跳到讀二年班，就咁開始接受正式教育嘅第一步。
幾年之後到考升中試時，Ronny話當年都幾驚考唔到官立中學會冇書讀，因為自己唔係一個好勤力嘅人，不過出嚟嘅成績都唔錯，終於考入皇仁書院。
湯家驊話，讀中學嗰陣絕對冇諗過入律師呢行，因為口齒唔夠伶俐，英文又唔好。高考時候，Ronny喺應考其中一科之前突然發高燒，結果肥咗佬，冇大專學院收，畢業後就入咗銀行做出納員。冇耐之後，香港大學開辦法律課程，二十八個學額得十四個人報名，湯家驊於是問人借咗一百蚊報名費，又喺報名表上一連三個志願都寫上法律，令到教授以為佢鍾意法律上晒腦，就收咗佢入港大法律系。
諗番起當年喺港大讀書，佢話真係幾辛苦，日頭要幫人補習，夜晚又喺灣仔嘅酒吧彈吉他賺學費。但係Ronny依然以第一名成績負笈牛津大學，當年賣晒成副身家都只得八百蚊，去英國嘅機票費用都係父母問人借嘅。到咗英國之後，兩袋空空，咁啱遇到大律師列顯倫（即後來嘅終審法院大法官）因為旭龢道山泥傾瀉失去妻兒，返英國療傷，列顯倫借咗二百鎊畀佢度過最艱難嘅時期。喺半工讀嘅情況下完成牛津嘅法律課程。
湯家驊鼓勵小朋友唔好輕易放棄，只要抱住希望，樂觀做人，始終都會守得雲開見月明。佢話香港家雖然冇普選，但佢依然相信，香港始終都會有普選