最近流感橫行，搞到香港人心惶惶，港府上下為咗對抗流感疫潮爆發，更加做到倒瀉籮蟹咁。遠在花旗國訪問嘅煲呔都要不時越洋了解吓流感疫情，不過，呢位抗疫主帥呢幾日原來都不幸中咗感冒（係咪流感八方就唔知），可見特區阿頭呢個位真係唔易做。
煲呔呢幾日講嘢都不時咳嗽，星期四晚喺華盛頓嘅亞洲協會晚宴就開始有啲咳，到噚日同傳媒總結美加七日行程時，煲呔個樣同把聲都好攰，睇稿比以前頻密咗好多，有時講講吓都忍唔住停低咳幾聲，睇嚟病得都唔輕。煲呔咳完就同記者講，搞到病都係因為行程馬不停蹄，忽冷忽熱，所以有啲感冒。
華盛頓同紐約𠵱家天氣真係幾寒，加上行程緊密、休息時間唔多，都咪話唔易病！病嘅應該唔單止煲呔，有老外行家都病埋，但佢重要跟埋煲呔去倫敦採訪。
八方都希望，煲呔今日下晝返香港後，可以好好休息吓，病好番晒先再到倫敦推銷香港。
爆料熱線：29290000、27860099
報料傳真：26239278
報料電郵：[email protected]