1隻BullTerry樣笨識捉賊，2隻儍更更食嘢唔鍾意同人爭；貴婦夠巴渣可以做管家，6呎大丹唔打得都睇得；龜仔淨係鍾意曬太陽唔會撩兔仔賽跑，葵鼠乖乖唔會打大交。8隻寵物共處1室，主人唔單止無損失，重俾佢啲寶貝逗得鬼咁開心㖭！大家嚟睇吓主人Lydia點錫呢班嘩鬼，就知道佢哋點解唔會六國大封相㗎啦！
記者：杜慧妍 攝影：林栢鈞
Kobo有張私家單狗床
作為一隻狗有個狗竇已經好開心，如果有埋張私家單「狗」床啦喎……嘩，會唔會誇張咗啲呀？一啲都唔誇呀，因為Kobo有成110磅咁重，Lydia怕佢瞓得硬地多會起「枕」，所以專登買咗張單「狗」床畀Kobo，真係恨死隔籬狗呀！
儍頭儍腦夠薑嚇走賊仔
唔好睇BullBull個樣好似儍更更咁，成日俾Bube玩騎牛牛，都無佢咁好氣。其實佢好醒目㗎，Lydia話BullBull曾經嚇走賊仔，成功保護屋企，一啲損失都無：「有次我去完街返嚟，發現個窗有被人撬過嘅痕迹，但就無唔見嘢。嗰陣BullBull喺房入面，房門對住窗口，BullBull知道有人想入屋，就隔住道閘係咁吠，嚇走咗個賊。」咁叻識得保住屋企啲財產，怪唔之得Lydia咁錫你啦！Lydia話試過帶BullBull落街散步嗰陣，有人離遠見到佢就大叫：「嘩！BullTerry呀！」然後拔足而逃。唔講你唔知，BullBull狗仔細細有成56磅，一腳踩落攝影哥哥隻腳度，即刻嗌救命呀，真係孔武有力㗎！
6呎大丹不敵貴婦狗
一隻得10磅嘅貴婦狗同一隻企起身有成6呎高嘅大丹犬，嚟場大鬥法：鬥吠、鬥咬、鬥惡，究竟邊個會贏？經過三個回合搏鬥，神勇Kobo對身手靈活嘅Bube無晒符，惟有攤喺梳化投降，Bube就意氣風發咁走去撩第2個玩。主人Lydia話全屋最惡就係最細隻嘅Bube：「佢好八卦，乜都有佢份㗎！成日撩佢哋玩，試過咬到Kobo隻耳仔留咗條疤痕㖭！」Bube妳咁巴渣，小記唔封妳做「女皇」都唔得啦！不過Lydia話佢哋玩完又無嘢㗎啦：「Kobo唔會嬲，下次又係咁樣狗咬狗骨囉！」
狗龜兔鼠齊齊玩
一間屋入面養咗4隻狗，2隻葵鼠，1隻兔仔重有隻熱帶龜，真係唔會七國咁亂？Lydia話佢哋雖然貪玩，但係個個都好乖，唔會搞破壞。不過BullBull似乎好鍾意龜仔個竇喎，一時走埋去催阿龜仔快啲行出嚟，一等到佢走出嚟曬太陽，就即刻跑入佢個竇度坐啦！幾曳呀！問到Lydia點解會養咁多種唔同小動物，有大有細，佢就話原因好簡單：「佢哋得意囉！」唔同動物都會有唔同特性，但嚟到Lydia屋企，好似都相處得幾融洽喎！
