個市又試雞毛鴨血，恒指大散165點。恒指、紅指與國企3大指數中，有隻成份股最離奇，就係網通（906），收11.95元，升50仙，升幅4.4%。大行出報告，話網通收購4省資產後前景轉好，又話下月有機會被納入恒指成份股（現時係紅指成份股）。如果呢兩個理由係通嘅話，點解前日大市微跌中，網通會散75仙？
網通C輪：網通升，C輪3457與9186兩隻冷門C輪急升約4成，成交非常小。3457明年1月中到期，輪價1.21元，溢價3.7%，槓桿率9.9倍（有效7倍），引伸波幅32%。講數據，隻輪算唔錯，但買賣非常困難。
另1隻C輪9515交投較旺，成交金額8球以上，明年4月尾夠鐘，輪價1.64元，溢價13.9%，槓桿率7.3倍（有效4.3倍），引伸波幅46.6%，數據唔靚。網通C輪，唔易炒，因為正股上落，無路可捉，炒網通C輪賺到錢，靠運氣多過靠眼光。
和黃C輪4897：和黃（013）散1.25元，C輪隻隻謝晒，跌10%者已經好叻，最香者係4807，散78%，其次4897，散62%，兩隻都係末日輪。
4807輪價2.6仙，下周二最後買賣，溢價0.4%，槓桿率27.6倍（有效23倍），重有少少機會唔作廢。4897曾經係熱門C輪，昨日成交金額仍有25萬，下周一最後買賣，輪價2.6仙，行使價73.88元，正股低過行使價2元，隻輪係咁先機會好大。
章盛