黎姿、周汶錡和徐子淇前晚為時裝騷行天橋，黎姿擔任開場和壓軸模特兒，還在老闆夫婦陪同下出場，大搶風頭。她又自爆有追求者，難怪一講結婚，她得戚地說：「好快會有（得嫁）。」
黎姿、周汶錡、Rosemary、徐子淇和伍詠薇等前晚在金鐘為時裝品牌MOISELLE行騷，眾女穿上以宮廷服為主題的服裝，酥胸半露。身為代言人的黎姿除為時裝騷打頭陣外，在壓軸表演時更穿上搶眼的紫色短裙，並在時裝店老闆夫婦陪同下出場，搶盡風頭。
有專業人士追求
黎姿說：「套衫係大會安排嘅，我冇特別要求，有機會都想設計啲衫，呢個廣告商好好，成日贊助衫畀我，每年可以慳番幾十萬置裝費，慳番啲錢就用嚟買手袋同買鞋，我最貴買過約十萬嘅手袋，幾千蚊對鞋。」
黎姿表示平日吃飯開支不大，因為多數是追求者請客，她說：「買樓嘅嘢就將來等老公，我都儲定一筆姑婆本，結婚嘅嘢好難講，要適合先嫁，人生點都要嫁一次，好快會有，等我留意吓先。」黎姿自爆身邊不乏追求者，她說：「佢係專業人士，未婚，朋友介紹嘅，我唔知人哋有冇好感，我好享受大家精神上嘅交流，通吓SMS，好男人係恐龍，要睇住先，你哋放過我。」
子淇愛健康性感
而徐子淇的服裝亦非常性感，但她否認谷胸上陣，徐子淇說：「可能係燈光效果。」問她男友李家誠可會詐型，她說：「佢唔理我啲嘢，不過個個男人都唔鍾意女友性感，我又唔係暴露狂，總之健康高貴性感咪得，我入行八年都冇着過三點式影相。」
採訪：駱華齡 攝影：陳慧安
