昨日大市雖然跌咗百幾點，但先前曾被芬佬沽貨的中型股，就有部份開始止跌回升。經紀黃話，最近陸續有證券行發表報告，話個別工業股被沽得過份，現時可以考慮吸納。
其中一隻被芬佬沽得最淒涼，但大股東又唔忿氣頻頻增持的建滔化工（148），近期由20元樓上沽落嚟，噚日試過16元水平低位後，似乎已見支持。由於股價跌咗咁多，近日有證券行調升評級，話現價買得過。
建滔喺7月份配股減債，班芬佬先至驚覺原來建滔負債唔係輕。由當時開始，芬佬就開始沽貨，建滔股價一直受壓，雖然大股東哥哥多次增持亦無補於事。不過，最近有分析員見過建滔管理層後，覺得公司仍然有得諗，尤其係旗下喺星洲掛牌嘅依利安達，即將在下月初公布業績，估計表現唔差，相信可以助建滔一把。
建滔昨日一度跌至15.95元，其後調頭回升至16.80元收市，逆市升5％，成交股數282萬股，金額4701萬元。
慕容小初