上星期六本欄講「讀本欄入哈佛」，次日收到一位讀者Marissa嘅電郵，M小姐話：「我係一個UCLA讀書嘅留學生。打從《蘋果日報》出版以來，我媽與我日日都看你的專欄。（按：左丁山其實自九七年中先至喺《蘋果日報》寫稿）。我入讀UCLA，你嘅功勞真係唔小。嗰時你介紹過DeAnzaCollege嘅姊妹學校FoothillCollege。但係唔知點解我會揀讀DeAnza，讀咗兩年啱啱transfer到UCLA。如果冇你當年嘅介紹，我現在都不知道在做甚麼。我日日都追看你啲專欄㗎！請畀心機喇。」左丁山寫稿好好心機，現在寫到右手日日痠痛，仍然死捱，諗起一個中學同學畢業後移民檀香山，到海灘為遊客畫T恤（其實係在T恤上畫夏威夷海灘風景），甚受歡迎，收入好唔錯，點知畫咗十幾年之後，隻右手舉唔起，於是返大陸睇中醫，搵針灸，冇乜效果。呢排左丁山右手痛，諗起呢位同學，有啲驚。
讀者M小姐冇選錯學校吖，不過一切靠你自己努力啫，去到美國讀社區學院，唔係個個入到UCLA與柏克萊嘅。Foothill，DeAnza冇乜分別，讀邊間都一樣，以左丁山睇，Foothill嘅校園靚啲，清靜啲，而DeAnza位於Cupertino，該地係蘋果電腦總部所在地，可以吸收蘋果靈氣。主修電腦嘅學生多數揀DeAnza，IT人視該地及鄰近地區為天堂，車程十五至三十分鐘之內就可以到達雅虎，Google，Intel，Cisco，SunMicrosystems，惠普等等新高科技公司嘅總部，見得多都會刺激自己向上，好過響香港讀IT，會俾人懷疑係唔係冇資格入會計系、新聞系、環球商業系與精算系。
順帶一提，星期一有專家喺電台講，會計師要識IT系統，先至能夠利用資訊科技方法嚟核數，防止作弊，澳洲十年前已有會計?IT雙主修學位，香港啲會計系學生不妨諗諗，大學亦應該考慮開辦呢個課程。