林嘉欣噚日同電影《怪物》嘅導演鄭保瑞同埋監製鄭丹瑞，去到香港城市大學出席由大專電影聯會舉辦嘅座談會。演講室一早坐滿學生，部份重要企喺度聽，有啲就喺門口等。不過在場好多學生都係向嘉欣提出問題，冷落咗鄭保瑞同鄭丹瑞，而問完問題嘅學生亦都即時要求同嘉欣合照。
睇首映難抽離
事後嘉欣都話覺得好似變咗一個fans聚會咁，佢話初時以為係電影學系舉辦嘅座談會，所以之前幾日就係咁喺屋企煲碟，諗住嚟到就會講啲學術性嘅嘢，點知嚟到先知係圍繞《怪物》呢套戲。
另外，外間有人覺得喺《怪物》入面舒淇做得好過嘉欣，嘉欣就話每一個演員都會挑剔自己，佢好多時睇番都會覺得舒淇做得好好。
不過嘉欣話呢套戲令佢緊張到失眠，有時重會有手震同埋好易攰。嘉欣話本來已經抽離咗角色，但係前排睇完首映又令佢投入番去。
