問蘇民峰有甚麼食肆好推介，還以為他計過度過先去食，原來佢嘅口味非常專一，如吃四川菜必去雲陽閣、京菜必去北京酒樓、上海菜必去雪園等，清一色中國菜，佢話：「喺香港好難搵到好食嘅外國菜，都係食番中國菜最穩陣。」揀食肆，純粹係隨心，風水？食完先再講啦！
記者：黃潔蓮 攝影：陳陶鈞、周旭文
長嘴茶壺有玄機
設計是方便侍應站在一個位置，便可以斟全枱客人的茶，不用四圍走，妨礙客人用膳。至於八寶茶材料包括花旗參、杞子、紅棗、合桃、陳皮、提子乾、香片茶和冰糖，有清潤提神補氣血的功效。（雲陽閣）
食神有樣睇！
蘇師傅話：「上唇飽滿、但唔能夠太厚。腳弓位要凹非扁平足，腳瓜要有肉為之福相。瘦人唔夠福相，肥人多係貪食而非識食。」
同四川食嘅一樣
自幾年前一次成都之旅，蘇師傅便愛上了川菜。回港後一次與學生在雲陽閣吃晚飯，發覺這裏的夫妻肺片與四川吃到的味道一樣，自此便經常幫襯，而且他每逢胃痛都必定會食辣的食物：「以前醫生以為胃痛唔可以食辣嘢去刺激腸胃，但後來先至發現係幽門螺旋菌作怪，辣椒有殺菌功效，所以食完辣嘢，個胃即刻唔痛。」川菜中有大量辣椒、蒜頭、薑等，都具有殺菌作用。
與北京樓有廿年感情
幫襯了近二十年的北京酒樓，皆因蘇師傅以前做髮型師、現在當風水師的店舖也在佐敦地鐵站附近，因經常來幫襯而成為熟客，與女友二人飽吃一頓也只需$200，認真抵食。蘇師傅得閒都會去雪園，原因都係夠就腳，由十幾年前在北角的總店開始幫襯，以前最愛公司附近的倫敦廣場雪園，現在就要走到較遠的海港城店。蘇師傅說這裏有全香港最好味的蟹粉小籠包，隻隻夠件頭。
2006狗年食旺地
食肆邊個位風水最好？蘇師傅說不會細分，但地區也會有影響，如初次約會異性或要傾大生意，就要挑選正確方位。
初次約會（桃花位）：正東
鰂魚涌、沙田、藍田、觀塘一帶食肆
求婚（喜慶位）：西南方
鴨脷洲、荃灣、九龍站、奧運站一帶食肆
傾生意（財、健康）：正北
中環、上水、旺角一帶食肆
蘇師傅推介
1.蘇師傅在四川時每日一碟夫妻肺片當早餐，呢間整嘅完全係當日口味，用上牛舌、肚、腱𦟌等滷後切成薄片，淋上麻辣汁醬即撈即食。
2.魚頭上密麻麻的覆蓋了一層紅噹噹剁椒王，內裏有丁香魚乾、乾貝等，女友最愛。
3.豬肉與蟹粉製成的金黃餡料，入口香濃的蟹黃鮮味，滲出淡淡的薑汁香味。
4.蘇師傅說呢款手撕雞充滿五香味，吃時切記要蘸點以豉油、大蒜、醋製成的醬料才夠味。
5.管挻好脆，加埋中間的西芹條，煙韌爽香。管挻是豬的喉嚨，至少要用四五隻豬才能炒成一碟。
6.用鹹肉、鮮肉與百葉結一齊熬足三小時，湯味鹹鮮味濃。
雲陽閣川菜館
地址：尖沙嘴彌敦道132-134號美麗華商場4樓
電話：23750800
北京酒樓
地址：佐敦彌敦道227號2樓
電話：27351316
雪園飯店
地址：尖沙嘴海港城港威大廈2期3樓3303舖
電話：21171038
