祥益副營業董事張才權話，今個月屯門二手交投淡靜，其中華都花園算係淡市中較突出嘅屋苑，有四宗成交，當中包括炒家睇淡而大幅減價出貨，接貨嗰個又係炒家，睇好後市，趁低吸納。 華都二座低層D，六百五呎，作價九十七萬五，每呎千五，原業主二月以九十五萬買入，隨即以百二萬放售，到十月頭減價至百一萬，最後再減多十幾萬，前後減咗二十幾萬，計埋雜費要蝕本離場。