建行（939）首日掛牌，收2.35元，同招股價一樣，本港冇窩輪發行，遲吓肯定成批推出，發行商要搵食。喺新加坡，昨日則有3隻窩輪登場，全部係Call。
第1隻，星洲code係939W3，明年6月中到期，收0.19元（坡紙．下同），溢價24.1%，槓桿率5.4倍，發行50球，昨日成交22球。就算有門路有經紀幫手做嘢，咁嘅溢價，點買得落手？有咁高溢價，都未嘗不可，只要槓桿率有一二十倍就得，不過，槓桿率只得5倍幾。隻輪發行價0.22元，昨首日潛水14%；溢價過高，再潛深啲畀你睇，除非正股三級跳升。
第2隻，星洲code係939W2，明年7月下旬夠鐘，收0.16元，溢價25.4%，槓桿率6.4倍，發行200球，只得半球易手。隻輪發行價0.20元，昨日潛水20%。咁嘅條件，好過上邊嗰隻少少，但都係好貴。
第3隻，星洲code係939W，明年7月中前夠鐘，發行量200球，昨日成交16球。發行價0.25元，收0.155元，大潛水36%。溢價12.2%，槓桿率6.6倍。呢隻似樣好多，咁嘅溢價咁嘅槓桿率，炒家會覺得舒服啲，就算輸，都輸得條氣順啲。
8月中，交銀（3328）發C輪，當時正股由3.20元殺上去，最高見3.525元，C輪溢價好高。到𠵱家，正股3.20元，同當時殺上去之前相同，但交銀C輪則散晒，有啲較當時香咗6-7成。最大理由，係發行時溢價半天高，到𠵱家回到稍為合理，輪價已經面目全非。
不久之後，會有大批建行C輪出爐，奉勸發行商，溢價咪高到20-30%，咪自己着晒數。窩輪炒家如果個個變咗斬開8塊嘅水魚，重邊度有錢輸？
章盛