政府話將來要強制性驗樓，三十年或以上樓齡嘅舊樓，每七年驗一次，樓齡五年以上舊樓，每三年驗一次窗門。如果政府建議成為法例，最快○七年就會開始執行，房屋協會與市建局今年年初已經主動向舊樓業主提供維修諮詢服務，大家一上房協與市建局網站，就知道詳情，不過香港三十年樓齡嘅舊樓，佔咗全部私人樓宇嘅三分一，呢個比例會越嚟越高，房協與市建局集中力量幫啲舊區舊樓小業主，半山區舊樓業主就識得兼有財力去自己搵測量師、工程師、鋁窗專家嘞。
政府措施會產生兩個效果：（一）三十年舊樓樓價會跌，單幢樓跌得更多，如果大市好，樓價唔跌嘅話，呢類樓宇嘅升值潛力有限，即係會升得慢，跌得快。香港地，啲樓係要嚟炒嘅，唔係要嚟住嘅，一般建築質素麻麻，外牆最多頂到第二十年，已經滲水，屋內喉管會破裂，唔使政府強制驗樓呀，淨係自己見到浴室廁所天花漏水，已經有排煩，藝術教師Ｂ住響沙田第一城，幾個月前將全屋翻新，髹過灰水，裝修佬交貨之後一個禮拜，廁所天花已經唔同咗樣，搵裝修師傅「算帳」，裝修師傅睇完之後，對藝術Ｂ講：「對唔住，唔係我錯，應該係樓上漏水，你叫樓上整完，我再嚟同你搞過。」幾個月心機，就此化為烏有。記者Ｃ住在火炭二十年舊樓，成日俾樓下嘈，話佢廁所漏水，經過一番逐戶查詢，原來係頂樓漏水，於是層層受影響，裝修停擺，要等頂樓業主做工夫。各位買舊樓，大裝修之前，唔該仄清楚樓上以至頂樓有冇漏水，二十年或以上嘅舊樓，發生漏水事件嘅機率大過百分之五十。
（二）有商機喎，左丁山急call地盤監督惡佬明：「喂，你熟悉樓廠建築，又出身於鋁窗世家，不如快啲諗吓自己開公司，專同舊樓做維修，自己做個體戶老闆啦。」惡佬明為之心動，橫掂建築界失業率高，冇工開係家常便飯，開定公司等政府發威唔會蝕底啩？