前幾日經開觀塘apm接到日本餐廳白木屋的宣傳單張，介紹中用來打頭陣的是$48午市自助餐。口痕友見到即話：「自助午餐？係唔係只得沙律係自助任食嗰種呀？埋單肯定唔止呢個數啦！」又係嘅，好多食肆都用一個超低價吸引你入場，結果埋單嚴重超支，確實㷫過火屎！今次我決定走入去試食，睇睇又係唔係間呃錢舖！
記者：趙善怡
攝影：陳偉強
Imagegirl：Yankee
未食先畀$48 夠均真！
門口未踏進侍應哥哥已向我收錢：「我哋係要客人先畀錢嘅，多謝你48蚊，可以任飲任食60分鐘。」$48無加一，果然夠均真，畀完錢就可揀個靚位開動腸胃。對一般上班族而言，60分鐘吃個飽飯根本綽綽有餘，而自助餐是由早上11時開始至下午3時，定必meet到放飯時間。
廿幾款肯定回本
冷、熱盤、前菜、主菜、甜品加加埋埋有成二十幾款揀，回本必食除了原價$68的魚生飯外，首推從日本運來的手打烏冬及秋刀魚。至於香港罕見嘅地道家常菜如關東煮、酸汁水餃和菠菜厚蛋一定要食多幾件。至於飲品方面，自助餐會不定時提供巨峰提子乳酸或橙味乳酸、無糖茶及本人推介的香濃咖啡任飲。一口特飲一口特製甜點，好滿足呀！
裝修玩高檔
約有200個座位、佔地4,800平方呎的白木屋，食物價錢相宜，但裝修一啲都唔馬虎！
食客食評
白木屋居樂屋
地址：觀塘道418號apm商場L6-3
電話：25618188
營業時間：上午11時至凌晨2時
自助午餐供應時間：星期一至五上午11時至下午3時（任食60分鐘）
收費：成人$48，12歲以下小童$24（不設加一服務費）
