煲呔同肥龍夾手夾腳炮製政改五號報告，除咗民主派外，左派、商界同鄉親父老個個都話好，重𠱁到班區議員鬼死咁開心。梗係啦，連委任區議員都有份選特首，真係天大光榮，夫復何求？有咗班區佬支持，政府hardsell方案，忽然好似得到強大支持。
既然班區佬咁重要，為展示一吓自己嘅誠意，肥龍當然要行勻十八區，你話係聽吓意見又好，話係同佢哋打吓交道又好，最終目的都係希望班區佬多多支持，營造聲勢，壓倒民主派。
政治公關勁到痹嘅肥龍，噚日去到元朗同油尖旺兩個區議會，使出渾身解數狂冧班區佬。好似喺元朗區議會咁吖，肥龍總結發言時，就特別出動「心底話」。佢先賣關子，話自己等咗好耐，都聽唔到老朋友發言，真係愈等愈急；正當大家諗緊個老朋友係邊個時，肥龍竟然話：好彩最後一個輪到發言嘅就係老友。
原來佢口中嘅老友，係發言時狂插政改報告嘅白鴿黨成員黃偉賢，真係出人意表。肥龍解釋，舊時喺立法局，已經同黃偉賢好熟，𠵱家重遇梗開心；佢重話希望第時加咗議席，黃偉賢可以入到立法會。用加入立法會嚟游說黃偉賢支持方案，實行誘之以利，都咪話唔厲害。
會上傳來陣陣剪指甲聲
淨係讚民主派又點可以皆大歡喜呢？肥龍最後梗係要向所有區議員大派鞋油。佢話聽完啲議員發言，覺得水準好高，政府要放權畀區議會實在毋須擔心。用咁肉麻兼骨痹嘅說話𠱁班區佬，只有肥龍做得出。而班俾肥龍大讚特讚嘅區議員，梗係開心到飛得起，話撐硬政府，又話阿爺叫到，點會唔支持，聽到八方毛管戙。
開會期間重有段三級嘅插曲。有位叫做文富穩嘅區議員趁住司長在場，表態支持政改方案後要講題外話，點知主席鄧兆棠話唔得，結果佢老哥大發老脾，無厘頭咁話反對政府委任啲鹹濕嘅議員，真係唔明解。而最離譜係，開開吓會，竟然傳來陣陣剪指甲聲，邊開會邊剪指甲，認真「水準好高」。
傳真︰2623-9278
電郵︰[email protected]