特區政府駐日內瓦世貿組織常設代表苗學禮同太太黃雅貞噚日千里迢迢返港，八方以為佢為十二月嘅第六次部長會議而忙，但原來苗學禮係以收藏家同展覽發起人嘅身份返嚟，佢話，香港有咁優秀嘅警隊，唔使怕有人嚟搞事喎。
八方都記得苗代表愛好收藏清末民初嘅雕瓷，但係唔知佢會真係搞個展覽，出錢出力。呢個名為《素影浮瑩：景德鎮清末民初雕瓷展覽》噚日喺中大文物館開幕，副校長楊綱凱、館長林業強同另一位籌劃人許建勳親自主禮。苗學禮講番佢當年喺英國首次邂逅雕瓷，到佢行荷李活道對瓷板如何一見傾情，以後就開始鑽研，搞到原來冇人問津嘅道光以至民初嘅作品忽然有價。
今次展出嘅作品有一百六十六件，當中有嚟自日內瓦鮑氏東方藝術館以及上海博物館，亦有嚟自私人收藏家如前高官程尚文。剛退下火線嘅詩姐姐都有嚟睇展覽，不過佢就好堅決話唔答記者問題。個展覽一直到二月先結束，聽日重有景德鎮專家演講示範㖭。
傳真︰2623-9278
電郵︰[email protected]
