恒基主席四叔李兆基左右手、集團副主席林高演，○五年度董事袍金，加埋基本薪津連花紅退休金，共收一千五百三十萬九千，比前年多近五百萬，加幅四成八。 相反，做老闆嘅四叔，就減咗四十八萬九千蚊人工，只係攞二百八十九萬六。不過，佢收到六億七千四百萬股息，增加六千萬，減幾十萬人工，濕濕碎。四叔兩公子家傑與家誠，就分別攞四百四十五萬同三百一十八萬。 恒基賺成百億，管理層人工當然好，相對於電影大亨──鄒文懷，佢嘅嘉禾娛樂蝕成千三萬，所有董事都冇袍金，至於鄒文懷本人，亦都只係得嗰三百九十三萬九千蚊。