何韻詩早前於舞台劇中翻唱達明一派的《禁色》，歌曲將收錄於專輯《梁祝．下世傳奇》第二次版內，日前阿詩更邀得黃耀明擔任該MV的男主角。而唱片公司特別租借「浴德池」及以六位數字購買一盞三十多磅的紅色水晶燈作布景，阿詩對該地方亦十分好奇，四周參觀，她說：「平時呢度只係招待男賓，今日真係要睇番夠本。」
觸電更浪漫
由於MV中兩人須於浴池中拍攝摸着水晶燈的場面，但二人因手濕的關係要特別小心，但阿詩卻笑言能與明哥一起觸電十分浪漫。其中兩人更穿上外套浸在浴池中，但由於水溫高達四十多度，令阿詩不時大叫救命，她說：「真係好辛苦，浸到乜皮都皺晒，加上喺咁嘅環境下做戲，都好大挑戰。」