新地觀塘apm商場，相信係今年搞活動最多嘅場，要數晒都唔容易。 𠵱家又有新活動搞嘞，就係慈善馬拉松唱K，請咗近百個本港著名歌手，連續唱足八十二粒鐘，流行歌發燒友，今次肯定聽出耳油。至於在場人士，只要捐三十蚊畀樂施會，重可以上台唱番首，同偶像近距離見吓面㖭。 新地代理租務總經理馮秀炎話，希望呢個活動，可以創出健力士紀錄。