港股又連升2日，恒指在14300水平的支持，初步經得起考驗。噚日在大戶力壓之下，恒指曾一度落到14362，跌62點，但尾市反覆回升，結果以14458收市，升33點，交投較靜，只得160億元。不過，上升股（不計認股證）只得189隻，而下跌股則有430隻，人心虛弱，可以得見。
目前除升降指數嘅表現重係好差外，基本上大市短期嘅跌潮應已到底，後市反彈後即使再跌，跌幅亦會好有限。現時美股已有迹象轉好，期指大戶轉倉完成，後市會較明朗。
大市轉穩，重磅股滙控（005）亦由低位回升，收121.5元，升0.6元。滙控由9月8日的高位127.2元，反覆回落，到120元才企得住，噚日升番上10日平均線（121.21元）之上，短期有機會重上124元。滙控05年（12月年結）上半年，獲利590億港元（下同），升9.5%，全年預測1120億元，每股盈利9.97元，現價計預測PE12.2倍，比外國同業平均的13.8倍為低。
荷銀調高評級至「買入」
滙控自宣布中期後，好多大行都調高其目標價，最新係荷蘭銀行發表嘅研究報告，看好滙控業績、盈利能力及現金流情況，將滙控今年每股盈利預測調高5%，明年則調高10%，投資評級由「持有」調高至「買入」，目標價由9.2英鎊調高至12英鎊，折算係165港元，即係有35%嘅上升空間。
荷銀係目前大行中睇得滙控最好嘅一間，高盛亦係滙控好友，但近日佢嘅睇法變得稍有保留，將目標價由146元降至138元，但仍維持「優於大市」評級。
高盛嘅理由係滙控業務需要克服多方面困難，包括債券孳息曲線平坦、息差受壓、美國銀行業前景陰霾，及英國銀行業具有爭議性嘅前景。不過，若滙控繼續在亞洲市場包括日韓及台灣等地進行收購，業務仍可望有雙位增長。
滙控旗下嘅銀行業績幾靚，近日宣布佔40%權益之沙地英國銀行9個月盈利上升50.8%，至創紀錄的5億美元，而加拿大滙豐今年第3季獲利1.13億加元，升37.8%。
郭兆誠