梁詠琪前晚駁了一頭紅色長髮賀她的髮型師遷新舖，GiGi只收取友情價做代言人，其獅子頭造型將掛在舖內作生招牌。
梁詠琪（GiGi）、蔣怡和甘國亮前晚到銅鑼灣出席髮型屋喬遷開幕禮，GiGi獲該店贊助剪髮快九年，她特別讓髮型師做了兩個新髮型，由余家安作美術指導拍了兩款照片，放在店內作生招牌，算是投桃報李。
包全家理髮
GiGi前晚則以一身維多利亞式造型出現，駁了一頭紅色長髮，身穿白色古董裙，而蔣怡也不輸蝕，以吊帶裙示人，兩個高妹同場競豔。GiGi說：「我今日全身都係佢哋搞，除咗對鞋係我自己嘅，條裙係古董裙，着咗有啲女人味。其實我嫌個頭唔夠紅，新開張應該紅噹噹啲。」
GiGi表示較喜歡獅子頭那個造型，因為從未試過這麼狂野。她又表示為髮型屋做代言人只收友情價，她說：「啲相佢哋鍾意擺幾耐就幾耐，冇計，我阿媽同細佬都嚟呢度剪髮，佢哋都唔敢收錢，成家都贊助晒。」
短髮𠱁外婆
GiGi表示從未留這麼長的頭髮，她說：「我細個時又瘦，啲頭髮好長，後來外公過身，外婆好唔開心，佢話怕我啲頭髮吸晒營養，叫我剪，我想𠱁佢開心就剪短。剪髮後有人搵我拍廣告同入行，於是短到𠵱家。」
採訪：胡比 攝影：陳志嵐
