有大人物向左丁山建議，本欄之人物代號如肥佬Ｌ、公子Ｃ、靚女Ａ、賓架Ｌ等等，睇落有啲疏離感，唔夠投入，唔夠到肉，令讀者覺得唔爽，唔過癮，最好寫埋肥佬黎，公子鄭等等代號，等啲人物更加呼之欲出。大人物之言，左丁山當然要考慮，佢一年睇足ＧＧ細語三百六十五日，意見值得重視。
本欄讀者上有教授局長議員，中有中環財經界行政人員，基層有師奶阿嬸學生哥，無所不包，皆因蘋果讀者夠多，橫切面夠闊之故。據左丁山所知，全城公關人員都睇住本欄，所以下筆之後，有時要修改字眼一兩次，以免暴露消息來源，「斷線」之後，對人對己都冇好處，累親戚朋友俾上司鬧，局長鬧，俾監管當局訓話警誡，左丁山就變咗神枱貓屎咯，想話寫稿嚟幫補吓生活費都唔得。有一次，某局長在香港會同左丁山講：「你講親賓架Ｃ、賓架Ｌ，我就玩猜謎遊戲，有邊個大賓架我唔識呀，我估有邊幾個成日放料畀你！」俾佢估中，盞大家尷尬啫，嬉戲文章，無謂咁嚴肅處理。
左丁山學寫廣東話文言白話三及第文字，始於睇三蘇高雄專欄，真正有領悟就係睇「中區麗人碧琪」，後來鄭大班出版中文版Playboy，與總編輯張寬義認識，張總以筆名楊八妹，在《信報》寫八卦消息欄，係八十年代嘅「李八方」，當時凡係中環人都睇《信報》四大專欄，就係林行止社論、曹仁超、碧琪、楊八妹。與楊八妹熟咗，問佢點解咁吃得開，乜料都有，講完新地九倉，又可以講長實和黃？楊八妹話：「細佬，有少少秘訣唔怕講畀你聽：（一）唔可去得太盡，留有餘地，等當事人有彎轉；（二）事實不可扭曲。古仔要真，但為咗保護消息來源，時空不妨扭轉幾度，等放料人必要時自辯不在場；（三）一啲人物身份，除非人哋唔介意或者無傷大雅，無謂寫到明，寫到呼之欲出，行內人士明白就得啦。」張寬義死後，好耐冇人寫得出夠過癮嘅楊八妹專欄，左丁山自認遠遠不及，聽完大人物勸喻，以後適當地平衡吓，希望各方滿意啦！