唔使問阿貴，今日港股的焦點必定係建設銀行（939），但小初發覺今次建行同上次交通銀行（3328）掛牌，大家反應好唔同。上次交行掛牌前夕，人人只係諗住股價可以升幾多，但今次建行掛牌前夕，小初好多朋友都只係問隻股會唔會破底？氣氛咁差，實在好令人擔心建行今日嘅表現。
近排兩隻新股，卡森實業（496）同噚日掛牌嘅南粵物流（3399）都係掛牌首日即告破底，擺明氣氛唔利新股，小初惟有祝福大家。
另外，供完股無耐及話去澳門投資嘅冠中地產（193），昨日延續前日升勢，最高見過2.575元，收2.30元，升17.95％，成交股數1851萬股，金額4446萬元。
經紀陳話，江湖傳聞隻股有班捧場客，喺早前每股1元供股時入咗場。今次炒作理由係進軍濠江。
不過，反觀濠賭股近期表現相當差，龍頭股新濠國際（200）昨日跌近2%，而有賭牌在手的嘉華建材（027），昨日股價更大跌9.15％，收3.725元，所以小初好難理解進軍濠江都可以成為冠中地產炒高嘅理由。
慕容小初