王菲由拍拖到下嫁李亞鵬，兩個人嘅一舉一動都成為咗大家嘅焦點，而自從阿菲愛上李亞鵬之後，大家漸漸發現佢好似無心戀棧事業，十足有意退出娛樂圈咁樣，阿菲重大部份時間都留喺北京，專心做李太㖭。但係最近內地有報道指阿菲決定出山，重要係為老公有份策劃嘅賀歲喜劇《好人李成功》主唱片尾曲，實行夫唱婦隨咁話喎！
客串警察甲
今次夫婦首度合作，實在有啲驚喜，據該劇嘅製片人韓先生透露，自從兩個人結婚之後，李亞鵬都盡量避免同阿菲喺工作上有乜聯繫，但係為咗李亞鵬，阿菲居然會出手幫助造勢，認真唔講得笑。不過講到工作，佢哋都算公私分明，一切都重要同阿菲嘅經理人公司商量先可以作實。
呢部由黃宏主演嘅喜劇，講述一個四十歲的下崗工人李成功嘅故事，而李亞鵬亦將會喺劇入面客串警察甲嘅角色，同佢一齊拍檔扮警察乙嘅就係李亞鵬嘅老友王學兵，現階段導演同編劇亦喺度修改呢兩個角色，希望可以加入多啲豐富嘅喜劇色彩。
