郭羨妮同馬德鐘日前喺海運大廈連卡佛俾記者影到佢哋約會嘅相，噚日郭羨妮喺將軍澳電視廣播城回應呢件事話：「真係咁啱撞到，我遇到佢之後，一齊行咗幾個counter，之後我就去買化妝品，就係咁簡單。」
郭羨妮重話：「我梗係唔會做第三者，人哋有老婆有仔，今次呢個緋聞，可能係傳早咗，我同馬德鐘拍套劇都未出。」
「同姓郭嘅有緣」
馬德鐘噚日西裝骨骨，出席喺中國會舉行嘅THEMACALLAN試酒會，佢滿面笑容似有備而來回答記者嘅問題，佢話：「我當日去買嘢，遇到郭羨妮十分鐘就俾人影咗，之後遇到蘇玉華、洪天明就冇人理，為咗宣傳我哋套劇會唔會太早呀，都未出街，𠵱家近台慶，可能記者想做宣傳啦，咁我同郭可盈完咗未呀？我同姓郭嘅都幾有緣，嚟緊十一月我會同佘詩曼合作，到時咪變四角戀？」
問馬德鐘同太太又如何，佢就即刻收起笑容話：「我同佢冇問題，屋企嘅嘢唔回應，如果有問題大家都會知。」咦，睇睇吓馬德鐘同郭羨妮嘅「口供」都幾夾喎。
