由梁家輝和任達華等主演的電影《黑社會》，上畫四日收六百五十萬元，成績口碑皆不俗，前晚一班演員遂舉行慶功宴。而吳君如在商台節目中笑指該戲老闆向華強日前出席首映時，將「黑社會」貼紙貼在心口，甚為有型。
杜琪峯執導的電影《黑社會》截至前晚上畫四日共收六百五十萬元，電影公司前晚特地在灣仔舉行慶功宴，中國星老闆向華強夫婦、演員梁家輝、王天林、古天樂、林家棟、張家輝、張兆輝、邵美琪和林雪等都有出席。
「第一次咁公開」
吳君如昨日凌晨在其主持的商台節目中，笑指中國星老闆向華強出席該戲首映禮時，將寫着「黑社會」的貼紙貼在心口甚為有型，君如笑說：「呢排我覺得向生向華強型呀，你有冇見到佢去《黑社會》首映，佢名正言順貼住個貼紙——『黑社會』，係咪好型先？」另一主持田蕊妮即說：「第一次咁公開、公正嚟到同大家講『黑社會』。」鄒凱光亦補充道：「因為佢個仔生到同佢一模一樣咁，所以可以接手，佢可以行番出嚟。」
而前晚慶功宴上，梁家輝談到該戲在金馬獎獲十一項提名，他說：「心情好興奮，開心係好自然嘅，我戥成部戲嘅人都開心。呢啲敏感題材電影，成績都咁好，心情興奮到不得了。」
勸郭富城勿自滿
談到家輝有份演出的《長恨歌》全軍覆沒，心情即一百八十度轉變，家輝說：「唔知點解冇提名，好失望，大家都經過一番努力。」問他對金馬獎有沒有信心，家輝說：「我未睇過《最好的時光》，似乎來勢洶洶咁，我睇咗《三岔口》，係城城做得最好嘅一部戲。」此言即指郭富城以往表現都不好？家輝說：「唔係，佢表現出色，係勁敵，我戥佢開心，不過叫佢唔好自滿喎。」王天林表示自己非首次提名金馬獎，他說：「我後生時攞好多獎，有導演呀，終身成就獎咁，有鼓勵都好開心。𠵱家年紀有冇獎都唔係關鍵，都退咗休啦。」邵美琪謂在戲中有一幕被任達華勒死及丟落泥坑埋葬的戲份，是她拍戲以來最辛苦的，她說：「我拍完都控制唔到自己，係咁喊。」
採訪：魯萍
攝影：何榮亮
