星期五到陸羽飲茶，鬼佬Ｒ問：「二百年前今日有何歷史大事發生？」當日係十月二十一日，俾佢一問，一時唔知有乜大事，諗咗一諗，二百年前就係一八○五年，唔通係拿破崙打敗仗？於是講咗：「拿破崙滑鐵盧？」鬼佬Ｒ話：「你都識撞撞吓，不過早咗十年啫。今日係英法西海軍喺西班牙海岸發生一場大戰，theBattleofTrafalgar嘅二百年紀念日，我哋喺蘇豪區酒吧搞紀念酒會，有好多英國人、法國人到場，一齊飲番杯，你得閒就上嚟。」
呢場海軍艦隊大戰，歷史有名，尼爾遜海軍上將率領英國艦隊，大敗法西聯軍，奠定咗英國海軍以後百幾年嘅稱霸地位。過咗二百年咯，英法兩國幾個月前就攜手大事舉行紀念活動；唔知到咗二○九四年，中日兩國會唔會聯手舉辦甲午戰爭二百年紀念活動呢？
返到寫字樓，查番資料，滑鐵盧大戰係一八一五年六月十八日發生嘅。手頭上有一本AmericanSpeaker，教人如何演講，美國人演講，開頭要講一個幽默笑話，令場面輕鬆，跟住入正題，尾聲階段，又講番幾句輕鬆而有禮貌嘅說話。寫演講詞嘅時候，可以查吓呢本活頁書嘅資料，諗辦法引用，譬如十月九日係披頭四JohnLennon及佢與大野洋子所生嘅兒子嘅生日，可唔可以用此引起話題呢？十月二十日（1944年）係麥克阿瑟上將返回菲律賓，實現佢講嘅Ishallreturn，又可唔可以引用呢？十月二十六日（一九五八年）泛美航空首次使用波音七○七從紐約飛巴黎，一八五八年十月二十六日，一位費城發明家HamiltonSmith發明洗衣機，呢啲資料都幾趣致。
喺陸羽飲茶飲到兩點幾，一位身穿黑色三件頭英國紳士服，頭戴高帽嘅英國人從房間內走出嚟，同鬼佬Ｒ講：「今日係200周年紀念」，大家都知道佢講乜。呢位陸羽常客近來出咗名，佢就係捲入申領綜援疑案嘅前法官，案件不日開庭，可以留意吓。