好多人鍾意揸車時用戴太陽眼鏡，原來駕駛用嘅太陽眼鏡都好有學問，我哋就試過俾阿Sir截停，話副太陽鏡黑過墨斗，勸喻唔好用嚟揸車喎，因為會影響睇交通燈號同前車嘅煞車燈。阿Sir講得啱，好，我哋就解構駕駛用太陽鏡有乜特點。
記者、攝影：伍旋卓
駕駛用嘅太陽眼鏡，最重要係唔會將交通燈嘅紅、黃、綠色混淆，而且唔會影響觀察前方汽車輛嘅煞車燈。另外係鏡片內側有防眩光設計，令刺眼強光唔會由鏡片反射，影響駕駛者等。
貴唔一定好
駕駛用太陽鏡有咁多特別功能，其實又唔一定好貴喎，$10到$2,000都有，最緊要係睇睇有無以下功能。
鏡框要幼
幼身鏡框唔會阻礙駕駛者嘅視線，特別車身兩側的盲點位。
唔會太黑
鏡片顏色係茶色偏黃，唔會太過黑，亦有加強對比度效果，就算突然駛入昏暗嘅隧道，眼睛都好快可以適應。
紅黃綠唔變色
駕駛用太陽鏡最重要係唔好變色，特別係交紅通燈嘅紅、黃、綠色，透過鏡片望過去，唔可以有變色情況。
防眩光
鏡片後面會塗上一層防眩光嘅藍色物料，猛烈太陽之下，強光或眼睛倒影都唔會影響到駕駛者。
