俗語話「大難不死、必有後福」，行會新貴李業廣去年聖誕節在泰國布吉，經歷世紀大海嘯而舉家十一口無恙歸來，睇怕有多二三十年運行。入行會，濕濕碎而已。
整定留低鞏固江山
利國偉退休之後，金融界要搵個壓得住場嘅，除咗李業廣之外，重有邊個呢。所以個海畀面，而李業廣咁啱今次去泰國又唔揸船坐飛機，佢個外孫又提早一日在海灘開party；重有，佢在布吉買間屋，又買上山頂TheAmanpuri隔籬，而唔係喺海邊，整定佢逃過一劫，留番嚟幫煲呔幫肥龍鞏固江山。
李業廣今年六十九歲，在八新貴中年紀最大，但就鍾意潛水又揸法拉利，一啲都冇老態。佢本身係會計師，又係律師，又係公司秘書，唔止兩文三語叻，重可以同朱鎔基講上海話，同李嘉誠講潮州語，兼且八面玲瓏，在商界政界打滾咁多年，除咗一個姓梁嘅之外，都諗唔到佢有乜敵人。佢肯重入行會，煲呔簡直執到。
事實李業廣除咗手腕圓滑，喺證券界，佢係教父，亦係實力派。第二樣唔講，單係佢禮聘周文耀接替鄺其志，呢幾年交易所股價大躍進，香港股市地位日高，搶晒啲國內大公司來港掛牌，將上海對手遠遠拋離，就知佢幾掂。香港要做金融中心，係要有猛人發功。
同肥龍夾份打怪獸
有人話，煲呔今次禮賢下士，除咗玩溝淡，重玩配對。你有個陳智思，我就搵個李國寶；你有廖長城我又有夏佳理，你有前證監副主席史美倫，我就索性搵個候任證監主席，而且重掹埋個候任交易所主席入嚟；唔怪得有政府中人話，第日證監同交易所實會好融洽呢。
除咗煲呔，肥龍亦一定好高興李業廣坐入行會。大家睇吓強積金，當年就係李業廣做主席，許仕仁做總裁，夾手夾腳搞掂呢隻大怪獸。
藝術節亦一樣，李業廣做董事，許仕仁就幫手搞節目──真係開正佢嗰瓣。今日肥龍做司長，搵番阿教父入行會，順過順理成章啦。
爆料熱線：29290000、27860099
報料傳真：26239278
報料電郵：[email protected]