呢排全城都講皇仁點威，其實佢哋自己都講笑咁講，話威極都係為華仁仔服務啫，因為煲呔係香港華仁出品。
華仁又的確出咗唔少政界叻人，馬丁李同梁家傑都係表表者，唔怪得身為港華同九華兩間華仁嘅校監狄恆神父咁值得自豪。噚日呢位曾任兩校校長嘅狄恆神父以香港教賢學院董事會主席嘅身份舉行咗個講座，叫做「人文價值引介」，好多校友如蘇國榮同袁天凡都有出席。
唔講唔知，華仁啲神父全部嚟自愛爾蘭，以推廣耶穌會人文價值為己任，狄恆神父同一群有心人有感時下香港青少年缺乏方向，喺九六成立教賢會提供道德教育畀教師同家長，個會嘅贊助人好勁，就係煲呔。聽完講座，班同學重同兩位年逾七十幾歲嘅谷紀賢神父同魏志立神父慶祝生日，一齊食飯。
爆料熱線：29290000、27860099
報料傳真：26239278
報料電郵：[email protected]