燕窩，十個女仔九個喜愛，因為養顏。不同文化背景的人對燕窩的反應不一，「珍寶」最近推出燕窩菜式，今次請來兩位不知燕窩為何物的外籍人士擔任試食兵團，看看他們對燕窩菜有何評價。結果是「口水照食無問題」。
記者：馬靜兒 攝影：周旭文、譚盈傑
今次試食的包括燕窩焗蟹蓋、燕窩生翅白玉芙蓉及多款燕窩甜品。來自德國的Sedastian根本唔知甚麼是燕窩，「bird'snest應該係鳥類嘅巢，味道應該係鹹嘅！」意大利的Sonia則從來沒有聽過甚麼是燕窩。今次叫他們試食燕窩菜，把不知是甚麼的情況下吞下肚，二人只見每道菜都有一大羹白色軟膏狀物體，可能西方人對西菜先入為主，對賣相西式的焗蟹蓋評價最高。不過，二人都覺得燕窩沒有甚麼特別味道，奇怪為何香港人對它趨之若鶩。
燕窩釀焗鴛鴦蟹蓋$80/個
評價最高！
將雞肉、洋葱、蟹肉和蘑菇分別以葡汁和法式牛油汁撈勻，釀在蟹蓋上，焗至金黃色，再鋪上一湯匙燕窩。
Sedastian評分★★★9
我鍾意葡汁焗嘅味道，啫喱狀嘅燕窩本身無味，但加埋焗蟹肉就變得好好味。
Sonia評分★★★8
好似我平日食嘅西菜呀！
法式燕窩檸檬燉蛋$60
味蕾舒暢
將檸檬皮磨茸加檸檬汁做法式燉蛋，再加上金絲燕窩。食落有檸檬的清香，加上甜甜哋嘅燕窩和紅苺，味蕾舒暢得很想一羹接一羹。
Sedastian評分★★★6
好似我平日食嘅法式燉蛋，不過多咗檸檬味。
Sonia評分★★★5
檸檬味好香！
燕窩釀水蜜桃$60
出奇咁清
以糖水將水蜜桃浸一整個晚上，將金絲燕釀在水蜜桃內，加上濃濃的芒果汁。最初以為甜度會很高，入口卻出奇的清。
Sedastian評分★★★6
水蜜桃唔太腍，少少硬，我鍾意。
Sonia評分★★★8
一般嘅西式甜品，勝在賣相好。
Sedastian感惡心轉頭食晒
當他們知道燕窩是燕子的唾液後，Sedastian露出驚訝的表情，更說有點惡心。不過後來他又說，既然可以放入食物中，應該可以吃下肚，應該無問題，但無想過燕窩可以甜食。Sonia則反應平淡，笑說：「只要唔係狗肉，我都會食，下次帶埋老公嚟試試。」試食完畢，本來是記者試食時間。豈料，碟上餘下的蟹蓋被二人快速夾至自己的碟子上，其他燕窩甜品更被二人一掃而空。剛才說燕窩無味，但又掃清食物，有無搞錯？
燕窩生翅白玉芙蓉$380
滑溜彈牙爽口
白玉芙蓉其實是炒蛋白，不過加入翅同炒，蛋白滑溜，翅有咬口，鋪上大堆燕窩。入口有滑溜、彈牙和爽口三種口感。
Sedastian評分★★★3
未試過咁樣食蛋白。
Sonia評分★★★7
一條條係……魚翅？又幾爽喎！
黃金燕窩燉六寶$75/位
未上枱已聞其香
用椰子做盛器，以紅棗、百合、龍眼、雪耳、蓮子及雪蛤同燉燕窩。燕窩加雪蛤，兩款都是養顏食材，上枱已聞得陣陣椰子香。
Sedastian評分★★★7
外形幾特別，椰子可以用嚟做碗嗎？好香椰子味！
Sonia評分★★★6
唔係我嗰杯茶。
其他招牌點心試食報告
蟹子蒸燒賣$18
Sedastian──
賣相：７，味道：７
Sonia──
賣相：６，味道：７
「鍾意食上面啲蟹子，好得意。」
珍寶蝦餃皇$26
Sedastian──
賣相：８，味道：８「蝦肉唔會太腍，有彈牙感。」
Sonia──
賣相：７，味道：７
叉燒腸粉$20
Sedastian──
賣相：７，味道：８
Sonia──
賣相：８，味道：８「係咪即係中式香腸？」
珍寶王國（25539111）
地址：香港仔黃竹坑深灣碼頭徑
營業時間：星期一至六：10:30am-11:30pm；星期日7:00am-11:30pm