黃仁龍以四十一歲之齡，成為特區政府行政架構第四號人物，破盡紀錄。以前佢嘅知名度好低，除咗法律界之外，冇乜人識得佢嘅大名，𠵱家唔同咯，黃仁龍，皇仁之龍，街知巷聞，份份報紙查找呢位猛人背景，左丁山睇晒之後，初步認為黃仁龍並非太空來客，佢之上位，有跡可尋：
（一）根正苗紅，父親黃鑑烈係工聯會牛奶工會活躍會員，肯定係老愛國，與鄭耀棠相同。中國好睇呢類背景㗎。
（二）外父陳道宣係鍾士元喺「崇佳」嘅老拍檔，上一輩工業家，有錢兼夾在工業界輩份高。
有上述兩項條件，特區政府做背景審查之時，中央唔會反對，本地大把有力人士推薦，淨係鍾士元爵士已經可以一句頂萬句。
（三）讀書叻，成為尖子，佢嘅大名入咗一九八一年華僑日報標題：「黃仁龍七項文組科目成績優異，全部獲Ａ級，有志升讀香港大學法律課程。」既然咁叻，於是得到李國寶捐贈嘅獎學金，去咗劍橋大學，返到嚟就跟李國能做徒弟。
嗱，個人實力，讀書猛料，係專業人士成功嘅必需條件，有埋仙人指路，貴人扶持，就係充份條件。黃司長出身寒微，惟有讀書高，於是可以留學劍橋，因此又識到劍橋師妹陳筱茵，有機會投身李國能門下，三十零歲就搬上壽臣山，書中自有黃金屋，書中自有顏如玉，就係黃司長嘅最佳寫照。邊位住響屋邨嘅師奶、阿媽，教仔女讀書之時，黃司長係最佳正面教材。算命先生又可以分析黃司長六字（冇八字，因為唔知道佢嘅出生時辰），以此為「富貴命」範例！
人人讚好之時，黃司長叻成點？中環名律師Ｅ對左丁山話：「老實講，做律政司要管人管事管政治，唔需要一位稱得上brilliant嘅大律師嚟做，要一位highlycompetent，人又正直嘅大狀就得，黃司長就啱晒！」