早在04年已經曝光嘅SCE大作《汪達與巨像》，今個禮拜四（10月27日）正式殺入Game場！筆者幾日前就親身試玩過，裏面嘅3D動畫真係靚得交關，除咗隻Game支援逐行掃描（ProgressiveScan），令圖像滑溜到唔見狗牙外，主角同巨像嘅埋身肉搏更加精采絕倫！當打倒第一隻比自己大近百倍嘅猿猴巨像時，最尾一劍爆腦嘅場面，簡直震撼無比。加上採用全中文顯示，無論故事內容抑或操作，都令人打得非常肉緊！
記者：陳國輝
故事背景都係幾傳統嗰隻！話說男主角汪達為咗拯救已死少女，於是帶同佢嘅遺體，並騎着愛馬阿古羅，前往極為神秘嘅「遠古之地」，打倒古代遺民「巨像」！聽講，只有呢種方法，先可以搵出令少女起死回生嘅神秘法術。
故事雖然簡單，但具備中、英、日三種語言選擇，讓你清楚故事嘅來龍去脈，唔使齋打咁悶；同時，重請到曾經為電影及動畫配樂嘅大谷幸擔任音樂製作，如果連配音都換埋廣東話，咁就更Perfect喇！
擒上巨像施致命一擊
汪達攜帶嘅武器唔多，只得一把寶劍同弓箭，如果要將巨像殺死，一定要諗諗計先得！筆者試玩過，有小小意見可以俾大家參考。以擊敗第一隻大佬為例，首先面向有太陽及敵人嘅方向，並舉起手上寶劍，接着就會照出巨像嘅WeakPoint（原來係天靈蓋）！然後，當巨像轉身嗰刻，趁機爬上身體，再一劍劈落去大腿，令佢跪低；呢個時候，繼續向上爬，直達天靈蓋。最後，用寶劍直穿腦袋，之後狂噴腦漿嘅血腥畫面就會出現，唔使5下，巨像必死無疑！
此外，弓箭亦係主要武器之一，雖然可以「打離身戰」，感覺好似安全啲，不過每箭只扣巨像「一滴血」恐怕玩夠大半日先可以將佢殺死！所以，汪達對付巨像係需要多啲用腦，搵出對方弱點，然後一擊命中，而非一味亂揮寶劍就可以爆機㗎！
遠古遺迹場面壯觀
故事背景既然係「遠古之地」，所以，汪達所到之處，都離唔開草原、荒野、沙漠、峽谷、湖泊，以及神秘嘅廢墟遺迹。畫面雖然好壯觀、好靚，但所見嘅都係遼闊地形，就算主角有馬匹代步，亦試過花近20分鐘，才可以圍繞第一版嘅平原走一轉。嗰種感覺，就好似睇緊《寰宇風情》咁，勁多WideAngle，成套旅遊節目一樣；如果隻Game再搵埋鍾景輝做旁述，直情可媲美一齣旅遊特輯㖭！
旅程當中，汪達唔止要騎住阿古羅四處跑，佢重需要利用自身嘅攀石能力，到達一啲崎嶇不平嘅地形，藉此完成任務。當返回平地嗰時，玩家又可以㩒「×」掣，令汪達吹口哨，呼喚馬匹返回自己身邊；另外，無論喺行動抑或戰鬥狀態下，汪達嘅體力都能夠慢慢恢復，途中更可採摘野果補充，為擊倒巨像作好準備！
海陸空巨像打餐飽
「巨像」屬於遠古時代遺留落嚟嘅生物；佢嘅特點係體形龐大，身上長滿毛髮；種類之多，猶如幾億萬年前嘅「恐龍」，即係上天下海都有！今次，就介紹幾款讓大家先睹為快！
Profile
主機：PS2
開發：SCE
類型：ARPG
文字：中文繁體
玩者：1人
售價：$398
SONY（23452966）