喺無綫服務咗二十七年嘅武術特技指導、元華師弟元寶噚日聯同職工盟嘅李卓人、TVB職員協會主席劉順安、副主席歐耀興等人喺油麻地舉行記者會聲討TVB。元寶今年八月份喺番禺拍攝無綫新劇《人生馬戲團》期間遇襲，事後俾公司拖欠醫療費同工傷後不獲續約。
元寶喺遇襲前與無綫藝員鍾嘉欣、唐文龍同陳浩民等人喺番禺一卡拉OK為楊思琦慶祝生日，事後更有報道指鍾嘉欣同楊思琦曾經失蹤兩個鐘，元寶噚日話：「落到街諗住搵的士，點知三架車停低後，有十幾人揸住水喉通係咁打我哋，唐文龍第一個走咗，陳浩民當時就喺卡拉OK埋緊單，事後有同監製徐遇安講，佢話同公司講，不過原來一直冇同我報工傷。」
有為員工買保險
問後天就四十九歲嘅元寶生日願望時，佢話：「希望攞番我應得嘅，師兄元彪同元華打畀我都係咁講。」
無綫高層樂易玲噚日喺將軍澳電視城回應呢件事，佢話：「公司一向有同員工買齊保險，外地拍劇亦有旅遊保，佢係喺工作時間以外受傷嘅。」而元寶日前亦已經同勞工處報咗工傷，𠵱家雙方各執一詞，希望事件可以盡快解決啦！
