股路縱橫:禽流感起恐慌港股再受考驗

股路縱橫:禽流感起恐慌港股再受考驗

港股再試低位支持,恒指噚日最低14322,重喺上周五低位14309之上,尾段反彈頗為有力,收市14402,跌85點,成交縮到只得162億元。
禽流感又再引起恐慌,特效藥「特敏福」賣到斷晒市,有地方更賣到500元一盒,漲價1.5倍。人殺禽鳥殺得多,佢哋始終會來一次大報復。禽流感恐慌吹到入股市,一眾旅遊、酒店同消費零售股首當其衝,大幅下跌。
酒店股以富豪國際(078)跌幅最大,收0.47元,大跌12.6%;零售股景福集團(280)同謝瑞麟(417)分別下跌11.6%同10.2%;卓悅(653)同莎莎(178)則跌8.8%同7.3%。經過03年「非典」一役,投資者患了流感恐懼症,到現時仍未能平復。
不過,禽流感會否成為人類大災難,尚係未知之數,「非典」之後,全球都已提高警覺,希望在全人類努力之下,能「壓得住」禽流感,化危為安。
講番旅遊相關股份,在自由行同迪士尼概念下,零售股嘅表現確實係比預期為遜色,但酒店業則依然係好好景,好似呢個禮拜,5星級酒店Book到爆晒棚,2000元一日搵間房都冇;由家吓到年底,重有好多個大型展覽會在港舉行,酒店業應該重有排好景。
如果禽流感冇事,則現時已大幅下跌嘅酒店股,會提供到一個搵大錢嘅好機會,好似遠東發展(035),噚日跌到2.35元,彈番上2.45元收市,重跌4.8%,睇定可以落手。

利君醫藥食正個勢

禽流感震散咗旅遊同零售股,但製藥股就成為追捧對象,最威水係中國製藥(1093),高收1.52元,大升13.4%,長江生命科技(8222)亦有6.7%進帳。即將招股嘅利君國際醫藥(2005),啱啱食正個勢,公司早日在新加坡進行路演,𠵱家去咗英國繼續行程,基金反應幾好,最重要一點,就係利君表明上市後嘅派息政策,5年之內,每年都會將盈利嘅一半派出去,啱晒基金要「食息」嘅要求。利君生產的成藥逾20種,知名的「利君沙」在02及03年係中國「十大公眾最喜愛商標」,年銷售數億元。
郭兆誠