買車容易劏車難，響香港買車好容易，睇啱車款、畀定金，三日後就有車。相反唔要部車都幾煩，賣唔出又要車位泊車。好多人都聽過劏車，但相信試過嘅人並唔多，其實劏車要留意好多嘢，要有最好價錢，當然係賣佢過非洲喇。
記者：伍旋卓
香港劏車有兩種，一係拆零件，另一種係將部車原架賣去第三世界國家。拆零件嘅劏車收車價好低，以一部十年車嚟講，都係二、三千蚊，對車嘅要求亦低，好壞都收。賣去第三世界嘅車就唔同喇，同樣車齡，分分鐘賣到四至五千蚊，所以劏車前，就要睇吓你部車係乜嘢情況，識行識走的話，當然要賣佢去非洲。
日本車受歡迎
第三世界國家鍾意買舊車嚟做「積木車」，但佢哋要求好高㗎，一定要玩日本車，因為零件多，而且受得高溫天氣。一般嚟講，日產、豐田、三菱、本田車種價錢最高，一部甩皮甩骨嘅十三年車，只要識得行，就可賣到五千蚊。而十年嘅歐洲車就收兩、三千蚊。
要搵呢種收車佬，只要在二手車網上刊登自己部車，記得寫明「識行識走」，跟住就有好多呢種收車佬留個價畀你，睇啱咪打電話畀佢。
出動紅牌扣五百
如果部車無牌費，收車佬就要用「紅牌」上門收車，行內租紅牌要三百五十蚊，再賺你少少，所以扣你五百蚊。
無論劏車或賣去非洲，收車佬唔會攞走牌簿，你亦唔好畀佢，跟住記得攞番張劏車紙，再去運輸署報銷車輛。
