昨日升得最勁的股份，當然包括話私有化的南太電子（2633）同埋J.I.C.（987），前者勁升40.16％，收1.71元，後者都升28.39％，收0.52元，同私有化作價只有小小差距。
經紀黃話，南太電子私有化呢單嘢，令唔少芬佬覺得唔開心，隻股上市以來一直潛水，從未見過家鄉，𠵱家上市半年就突然話私有化。
最無厘頭就係大股東喺8月份，失驚無神減持，令股價大挫，好多芬佬當時嚇到走晒貨，點知大股東突然一招回馬槍話私有化，佢哋個心唔舒服，實在唔難理解。
另外，經紀黃睇好嘅大陸彩票股金屬電子交易所（8161），噚日又創新高，最高見過2.90元，收2.80元，升2.75％，成交股數有1109萬股，金額3157萬元。
經紀黃話，金屬電子交易所表現神勇，因為早排同佢哋搞配股嘅歐資行，噚日發表報告唱好。報告內容與金屬電子交易所向投資者表達的資料相近，由於人哋機構客戶多，加上目標價又調高到4元，所以受到追捧。
慕容小初