是日恒指最差之時，散過165點，埋單跌幅收窄到85點，未致太難睇。不過個市感覺唔多好，散戶人心虛怯，唔少股仔走樣，跌幅超過8%嘅股份有30隻。
估計恒指短期仍會再試低位，耐唔中彈一彈，炒上落，喺恒指C輪與P輪身上埋手。昨日10大成交金額窩輪中，有9件係呢類窩輪，可見玩恒指輪度日者，數不在少。
恒指C輪9138：9138係第3熱門恒指C輪，收16.4仙，跌幅11%。按照公式計算嘅理論跌幅係5%，昨日跌多咗，即係引伸波幅同溢價都縮咗，隻輪平咗。
如果個市定得住，9138應該會好番啲，可以優先考慮。隻輪明年1月杪夠鐘，溢價4%，槓桿率25.1倍（有效13.4倍），引伸波幅13.4%。
穩陣計，9138可以候再低之時先至上車，例如喺15仙以下考慮。其他啱喺低位撈貨嘅恒指C輪有3462與9155，數據亦係唔錯。
恒指P輪9157：仍然覺得大市會繼續尋底嘅朋友，搵恒指P輪埋手，可以諗吓9157。隻輪明年1月下旬到期，輪價17.2仙，溢價2%，槓桿率20.9倍（有效12.5倍），引伸波幅16.8%。理論上恒指每跌100點，揸9157可賺7.7%。
章盛