《黑社會》裏頭有連場的幫會儀式，除非你是油尖旺黑牌阿哥的未來接班人，否則無大趣味。既然導演故意畫公仔冇畫出腸，製造令人心思思、猜度劇本對白背後的含意的格局，觀眾不妨做個無牌影評人，評論一下，到底梁家輝的角色，是不是民主派的投射。
民主派意見多多，有「逢中必反」的綽號，裏頭有幾個人物，是出名的「大聲公」，跟梁家輝的話事人角色有幾分相像。到梁家輝摸底，叫任達華「放權」的鏡頭，簡直似曾相識。那不就是泛民主派要求的政改方案麼？梁家輝這個黨棍，請任達華下放權力，公平點講，不外是為「阿公」好，為「阿公」做事。阿公好，話事人好，整體得益。一言堂制度，行之有年，黑社會內部還不是一樣烏煙瘴氣，明爭暗鬥，拉幫結派。索性幫會民主化，大事革新，將權力對開，跟美國總統睇齊，有正副之設，萬一出事，便不會群龍無首。
變法的提案未出，任達華這個領導人，自覺「行政主導」位置勢危，馬上收起平日老好人的臉孔，打壓「異見份子」梁家輝。老好人都有底線，錢可以大家搵，反正搵唔晒，權力就堅持只能得一個核心，求變的反對聲音，一句都嫌太多。再講，就唔講得笑。任達華將政改提議「毀屍滅跡」後，接下來的兩年任期，會不會趕絕「親梁民主派」？趕得太絕反而有反效果，拍續集的話，會委任食腦的Jimmy仔入「黑底行會」，度一份洪門五號報告書出來，好好睇睇，呃晒字頭裏盲字唔識多個、在網上吹噓靚過F4的喪蠢蠱惑仔。