港股噚日又再下跌，恒指低見14322，但最終守於14400之上收市，收報14402，跌幅收窄至85點，成交162.31億元。
即月期指雖收於14400之下，跌109點，收14379，低水23點，但未平倉合約減至10萬之下，可能反映淡友大戶已平掉不少淡倉。
海升果汁（359）昨日公布上市計劃，但同行安德利果汁（8259）唔知攞景定贈興，竟然發出預警，話蘋果產量大幅減少，營運可能受到影響，結果安德利股價應聲大跌13.63%至0.475元，消息肯定打擊股民認購海升果汁的興趣。
海升今次發行3.0555億股，每股0.82-1.02元，集資2-2.5億元，規模唔算大，要獲得足額認購相信不難，況且此股有高盛投資基金持20%，應該會吸引到一啲高盛投資嘅捧場客跟買。
噚日不利老虎
噚日似乎不利老虎。老虎科技（8046）復牌，話需要500萬元擴充業務，可能會供股或配股集資，雖然500萬元唔係好多，但一講到供股，投資者即刻避開，股價即時急跌66.19%至0.024元，但成交就只有33萬元。另一隻東北虎（8197）亦大跌30.64%至0.043元，成交更只得3.2萬元，近期此股乾升乾跌，走勢難以捉摸。
零售股持續遭拋售，卓悅（653）跌8.89%至2.05元，莎莎（178）跌7.3%至2.85元，I.T（999）挫8%至1.04元，恒豐金（870）跌4.7%。黑客話，市場擔心租金及人工上升危害零售股盈利，不過，受息口上升影響，近排希慎（014）及鷹君（041）呢類收租股亦冇乜起色，前者跌0.84%至17.55元，後者升0.27%至18.50元。
阿虎