馬會主席夏佳理（圖）最近人氣急升，梗係啦，做咗候任行會成員，一舉一動都惹人注目，八方日前見到佢，追問佢係咪決定退任地產建設商會董事職務，佢話，可能唔會辭。
據夏主席分析，喺未來二十個月嘅任期中，佢估計，除咗西九項目之外，唔係好多議題同地產有關，咁反正佢係其中一個投資西九發展商藝林國際嘅顧問，即係話行會一講到西九，佢一定要退席，所以再三考慮，退唔退地產商會都冇特別意思喎。
夏佳理以前喺立法會就係地產界代表，同界別一向有好深淵源，一下子要退晒，佢真係唔捨得。煲呔成日想標榜香港成功故事，黃仁龍係一個，其實夏佳理都一樣，於是有人笑話，將來行會傾扶貧，好多人都會感同身受，就係貧唔緊要，扶貧亦唔緊要，最緊要有機會，又自己肯去掌握，咁貧窮就會由負面因素變成正面動力。
爆料熱線：29290000、27860099
報料傳真：26239278
報料電郵：[email protected]