為了護膚，女士們往往毫不吝嗇購買名牌護膚品。然而，皮膚保養得很好的皮膚科醫生史泰祖，卻坦言自己不會花費太多金錢護膚，因貴價護膚品效用與廉價的差距不遠，「成日收到名牌贈品，用咗都唔覺有太大分別。」
秋冬來臨，史泰祖說保濕產品只需含石蠟、甘油或礦物油等廉價物質，便可以鎖住皮膚水份，保持表皮角質層濕潤，這些物質價錢廉宜，又足以讓皮膚與乾燥說再見。
麥皮粉可止痕癢
另外，史泰祖又提供民間護膚秘方，「俗名叫豬油膏、即係emulsifyingointment（乳化軟膏），滋潤效果好犀利！」對極乾燥的皮膚如腳踭等效用特別顯著，而且價錢大眾化，「但藥房、百貨公司唔會擺喺當眼位置，因為咁平，佢哋賺得少。」塗保濕品時，份量不必太多，用後皮膚不感乾燥，表示份量足夠。
「我成日有名牌贈品，用落感覺好啲，又滑又香，但潤膚效果就同平價嘅差唔多。唔係話一定唔好買貴嘢，經濟能力夠咪買囉。」史泰祖提醒市民可參考護膚品品牌的外國網站，「好似美國對護膚品嘅聲稱管制好嚴格，唔似香港咁，任由生產商話產品可以排毒、美白！」
他指，早餐常見的麥皮粉可止乾燥引起的痕癢，外國人會加入水中浸浴。但港人工作繁忙，他建議可以將麥皮粉倒入棉手套，注入清水後封緊，「用嚟輕擦身體痕癢地方，再沖水就唔痕。」沐浴後趁水份未流失，塗上潤膚品，即可鎖住水份。
史泰祖最後透露保持皮膚幼白的心得：「每朝洗臉，日日防曬，冬天都要防曬！記住，我都係用平價嘅太陽油㗎，防曬度夠SPF15就得。」
記者：翁煜雄
本欄請來各行各業名人講解他們最熟悉的產品，並向讀者提供消費心得，逢周一刊出。