前日有讀者朝早十一點喺聖保祿醫院聽到張栢芝對住個電話喊晒話「一定要保住個BB」，後來佢公司聲稱話栢芝係疲勞過度發燒而入咗醫院，噚日朝早七點半栢芝就出院，返咗跑馬地寓所極速換衫，再去中環拍電影《最愛女人購物狂》。其間記者問佢係咪有咗，栢芝只係「嘿嘿」笑咗兩吓，冇作回應。
栢芝噚日做咗有線娛樂新聞台嘅訪問，佢話如果自己有咗一定唔會開工，因為BB對佢嚟講好重要，佢係BB狂，所以大家唔好作無謂嘅猜測，佢唔係有咗喎。栢芝重攞咗條病人手帶出嚟話自己有晒證據，佢唔係入住五樓嘅婦產科，而係住201號房。
唔會退出娛圈
栢芝話今次入院抽咗六支針筒嘅血去化驗，同埋打咗十幾支針，有蛋白質、抗生素同埋消炎針，重話老外男友Jeroen對佢好好，覺得西醫未必醫得好，所以買咗好多西柚同橙汁畀佢飲，等佢增強抵抗力，另外又喺玩具反斗城買咗隻公仔畀佢夜晚喺醫院攬住瞓。
栢芝又話佢阿爸鬍鬚勇煲咗魚湯畀佢飲，至於身在溫哥華嘅阿媽，知道栢芝入院就喺電話喊晒口叫栢芝退出娛樂圈，栢芝話佢唔會退出，就算搵到一個信得過嫁得過男人，都會每年拍一個廣告同一套戲喎。
