中大新聞與傳播學院四十周年，前晚喺美麗華搞咗個大party。雖然李純恩唔鍾意傳媒濫用個「大」字，而呢個party亦只得幾十圍，但用個大字去形容也不為過。因為現場所見，出席人馬，包起全香港一半傳媒嚟做，一定綽綽有餘。
大會請咗陳兆愷大法官做頒獎嘉賓，大法官平日好嚴肅，估唔到篇演詞都寫得幾幽默。佢話傳媒可以主動咁推動民意，亦可以被動地反映民意，至於製造民意呢，唔係推動亦唔係被動，而係輕舉妄動！佢重勸勉傳媒人要珍惜「無冕皇帝」嘅身份──雖然佢都唔清楚點解記者叫做「無冕皇帝」。
八方喺現場，遇見好多老師，有現任嘅，有已經離任嘅。新聞與傳播學院院長蘇鑰機就最開心，佢上台棟篤笑，話前任院長李少南做咗七年，做到白晒頭髮，要搵接班人，為防白髮事件重演，於是就搵咗蘇鑰機，因為佢冇乜頭髮喎。原來唔只十個光頭九個富，喺學術界上位，光頭一樣有着數。
爆料熱線：29290000、27860099
報料傳真：26239278
報料電郵：[email protected]